40 - 漢堡神偷

漢堡包，深信是每個細路仔心中覺得日日食都無咩問題嘅食物，大個了也保留了這份童真，聽到Burger隻耳已經伸長到旁邊。明明就係包一個，點解會有咁大嘅吸引力？又唔見食雞尾包同菠蘿包有咁上下。漢堡包魅力詳見麥記急口令（www.youtube.com/watch?v=Ve6vFf9lCY4），為這快餐附上魔力的，還有好伙伴：薯條同汽水，三兄弟加埋先完滿一個美式快餐。

雖然肥係肥，但一餐正斗嘅Junk Food絕對會令人全日都開心。一餐半餐就仲可以去MD或BK或MOS既，唔滿足囉唔夠皮囉唔合心水囉…所以難得想豁出去，梗係揀間好啲嫁啦。今次又過海啦，burgeRoom曾經係銅鑼灣炸脾對落的街，現已搬遷了，找天我會再去試試，希望地點轉味道不會變。

 

39 - 倒數失樂園

九龍城，從前空中巴士在寨城上空嘈吵升降，這區曾是車水馬龍的交通樞紐，今車多人不少但沒了依依嗚嗚，再嘈吵也是寧靜。今天的泰國城，仍然美食不勝數，又有間聞名的粥店關了，剩下的香港情懷不多，再多好也非昔日。在買少見少的國度，仲唔趁有抓緊一點？九龍城街市出哂名，出名夠大齊野，仲有發哥會經常到此買餸。而我記得它出名的，是一幅題字「勝過鮑參翅肚」，由蔡瀾先生寫好裝裱，一手包辦 (hk.apple.nextmedia.com/supplement/columnist/art/20050428/4844874)。

太把炮了，食店能得蔡san與店東拍張照已甚難，還有笑與否掛上味道好壞的都市傳說。那邊廂，喜愛拍照的發哥也送上全店一家的大合照予店東。樂園，一間街市頂樓的茶檔，是如此把閉。