呢啲嘢啊? edyeah: 44

青衣戲棚一年一度，千呼萬喚萬勿錯過，有食有飲平民天堂，位於青衣市政大廈隔離，由青衣城出發，朝運動場方向出口行去都只不過10分鐘左右。講就好多年，今次趁有個長周末，就去食吓嘢，帶吓經常話我唔帶佢出城嘅老媽子出去。(雖然呢幾個月已經好多時同佢周圍去…都仲投訴)

去到青衣城，順手睇埋自己大富翁80周年展覽。

一入到去，見到大大的竹搭起的戲棚，不得不佩服中國人的傳統智慧，實用性高的科學與藝術結晶。哈哈哈…我呃我媽話棚內係神功戲，無人睇的，真係戲弄到佢一陣。一入到去見到真君的神主位，同埋香燭檔。再走進點就看到一排排的檔口，那才是我們的重點，好不好！

上水蒜爆王 - 巴西野味火腎、紐西蘭深海魷魚
再走入啲當你開始被人群包圍，剎那間鬼影重重，滿場都是等食大眾的身影。入到去聞到勁多好嘢食味，但夾雜住一份重重嘅蒜味。我最鍾意口臭嫁啦，即刻拉埋媽媽排隊，好彩排得快，轉眼間我地後面都多咗好多人。由上水飛到出嚟嘅蒜爆王，一睇(聞)就知靠得住啦，無敵香。餐牌有5款嘢，必定有樣啱心水，我哋揀咗火腎同魷魚，一爽一煙軔。蒜爆之名並非浪得虛名，香口同埋唔會炒得過老，兩樣食材都好夠味，賣得夠哂多，所以實新鮮啦。

btw，火腎唔知係野味定惹味，唔知係咩野味呢！？我估係錯別字居多。

攪攪震原隻西瓜汁
轉眼間，個天黑得好快，人流都開始多。所以母親大人就同我兵分兩路，佢排餃子，我排西瓜汁。西瓜汁用電鑽加攪拌器，呢啲咪香港人嘅生活智慧囉，之前見過片係電鑽批片，呢個西瓜汁快脆得嚟又醒胃。你見全場無乜邊個唔拎住，就知抵佢賺。

元朗有得餃－秘製醬汁餃子

餃子又係過江龍，來自元朗，我排完原個西瓜汁，媽媽都未排完餃子。我見未排完就走上前影吓相，老闆們已經勁識做搞哂甫，狂傾計又叫我記得寫多兩句。咁著緊生意又敬業樂業，未食先加分。吹多兩句就已經排到，仲話認得我下次去元朗搵佢地有著數。餃屬少厚皮類，但內裏好足料，係韮菜肉餡，包起公整方形而滾開肉實。最無得頂係佢哋嘅醬汁，少酸少辣，有點似抄手但有蔥蒜茜，秘製醬汁異常開胃醒神。後悔嘅係無買兩碗…唔夠皮！

串燒鮑魚
鮑魚喎，25蚊3隻喎，抵啦喎。條隊又唔算長，燒又燒得唔錯，係全程一檔人的面口比較呆，可能做到手軟了。最好彩係我同媽媽只食一串，咁岩唔洗等。新鮮而殼肉好易分開，爽口而肉鮮，甜得嚟又夠肉汁。

串燒檔－雞豬牛、司華力腸
呢間都算係眾多串燒檔最多香火的一間，排隊排到出口轉埋出去。幾部電爐都應付唔到一大班為食餓鬼，排咗15分鐘左右先搞掂，勝在即燒即食，沙爹汁算係唔錯，唯雞肉唔算太抵食，得三舊仔。其他就都抵嫁，大大串，尤其腸大碌又燒得夠脆。

懷舊蛋形殼大菜糕

食到咁上下，梗係搵番啲甜品解吓咸，撞正大菜糕，無得傾，我同媽媽都好有默契點哂頭要食。佢揀咗原味，而我就試吓芒果同蜜瓜，順手影出嚟靚啲。一粒粒恐龍蛋咁大粒，用電話照住影好似寶石咁，雪得夠凍又爽，正到爆。

由1961年開辦至今，一年得一次，我走個陣由上而下咁影落去，你就會同我一樣感覺到香港人餓咗呢種大笪地形式嘅夜市幾耐。嘢食有好有一般，整體在水平以上，夜晚竹棚燈火通明，人潮湧湧，耳邊傳來陣陣大戲聲。幾逼都唔會推親大肚婆，踩到人會一聲聲唔好意思對唔住，帶扇的會撥埋隔離個份，這才是香港。

大家大熱天時唔介意身貼身排長龍逼行條窄路，為的除咗趁墟，還有在找那份失落的人情味和親切感。真正的城市發展，更該這樣，搞咩鬼飲食車。

仲有聽日，仲有下下星期可以去，星期六日結良伴挈愛去食吓逼吓啦，包過癮！